إذا كان كده .... ماشي .

حاجة غريبة بتحصل حول الهاله الكونية بتاعتي ومش قدره افهمها , منين أبقي متحررة زيادة عن اللزوم ومنين انا معقدة زيادة عن اللزوم؟؟!!؟؟.

تعريفين ابعد عن بعض ونقيضيين لبعضهم ( متحرره و معقدة ), هل حقاً أنا بحمل النقيضيين؟؟ أنا فعلا بحمل النقيضيين بس مش بالصورة اللي الناس شيفاها . طبعاً هايجيلي سؤال من السماء يقولي ( ازاي يعني ؟؟ ).

قولتولي ازاي يعني ؟؟ مممم حلو جداً. أنا لقيت واحده بتقول عني متحررة بشكل وحش لان لساني طويل , ودا دفعني اني اتسائل وبجدية ( هو اللسان الطويل دلوقتي تحرر؟؟ ) اكيد هو مش تحرر لان التحرر غير كده والتحرر جاية من الحرية والحرية ذات نفسها بتفرض عليك الاحترام, احترام الاخرين , احترام عقائدهم , احترام لون بشرتهم , احترام جنسياتهم, احترام بيئتهم الخاصة وعدم التعدي عليها أو عليهم بأي صورة مهينه أو مشينه . ولساني الطويل ليس تحرر مني ,لكنه زوبعة غضب خارج الفنجان, لا اعلم متي تنتهي ولا اعلم إلي متي ستبقي ولكني اعلم جيداً اني مرتاحه جدا مع لساني الطويل.

اما معقدة دا فـ ازاي ؟؟ افهمكم ... منذ فتره قريبة وليس بـالبعيدة, قمت بتطهير ايميلي الشخصي وتليفوني, قفلت القديم وعملت واحد جديد اكتفيت اني اديه للناس الموثوق فيهم وأصدقائي المقربين مني وعائلتي, فا بقي كل واحد يقولي ايديني اميلك اقوله سوري عندي فيس بوك بس , ويبقي واخد الموضوع علي صدره جدا لاني مش عايزه اديله ايميلي ... الله يا جدعان دا مش برضك ايميلي انا الشخصي؟؟ انا حره فيه اغسله اكويه احرقه اديه للي يعجبني واللي ميعجبنيش ولا انا غلطانة ؟؟ وبعدين الفيس بوك حل محل الايميل بل وهو اكثر أمان لان عن طريقة بتعرف اللي حد كويس شخصية الشخص اللي بيكلمك ان كان مريح او مريب او تافهه او ايه هو بالضبط؟؟ وبتقرر يا يبقي في دائرة حياتك او براها ... الموقف التاني بقي موضة مالهاش طعم او لون واحد يجي يقولي يا قمري ويا عسوله انتي ويا حبيبتي وانا اطلب منه التوقف وعدم تكرار تلك الكلمات, ودا لاني فعلا مبحبش واحد متجمعنيش بيه اي صلة او اي علاقة محدده او رسمية يقولي الكلام دا, لان اكيد مش من حقه هو يقولي يا حبيبتي ويا قمر ويا عسل ويا روحي ... لما هو يقولي كده امال اللي هارتبط بيه يقولي ايه؟؟ وطبعا لما بواجهه برأي بيقولي بكل تبجح أفرضي اني معجب ؟؟ وحتي لو معجب مش منحقك لانك معجب بيا تقولي كده ولا انا غلطانه, ماهو مش معقول يعني كل واحد معجب بيا هاسيبه يقولي كلام بالشكل دا امال بقي اللي انا معجبه بيه وبيني وبينه علاقة رسمية وواضحه ومحدده يقولي ايه؟؟ يا بطختي ؟؟؟, دا غير بقي اللي بيجي يسألني والهبل بيطل من عينيه ( امال لو عايز ادلعك ... ادلعك ازاي ؟؟) ملامح التعجب تعتليني تدلعني بمناسبة ايه؟؟ يقولي بمناسبة ان احنا اصحاب , بس انا اصحابي مبيدلعونيش بـ ( حبيبتي وروحي وعمري) لا ما هو انا مش اي حد انا حد تاني, للاسف احب اقولك انت فعلا مش اي حد انت شخصية خارج نطاق حياتي عشان كده بصر وبصمم ان مينفعش انت وامثالك تقولي كلام زاي دا, طبعا وقتها بيقولي انتي تقولي لي كلام زاي دا وانتي مش محترمه وانتي معقده وانتي وانتي وانتي  ... فتحولت في لحظة لحفاظي علي مشاعري واخلاقي وحق شخص في الغيب من انسانة مثقفه الي انسانة معقدة ولو بالصورة دي انا معقدة ... معنديش مشكله اهلا بالتعقيد .  دا غير اني كمان بكتشف ان في ناس بتقول عليا معقدة وغير مثقفه وان اكيد انا دقه قديمة لاني بلبس هدوم واسعة وطويله ,سؤال بيطرح نفسه ( من امتي الهدوم او الشكل الخارجي بيقول دا مثقف او متحرر او متحجر؟؟) تاني ربطنا الشكل بالعقل أأأأه ياني, فعلا مش قدره افهم ايه مشكلة الناس مع حجابي او حجاب اي بنت تانيه. طيب ما انا عندي اصدقاء مسيحيين وبيلبسوا طويل يبقي دول معقدين ومتحجرين والله لو الموضوع باللبس يبقي اهلا بالتحجر والتعقد ووداعاً للثقافه والتمدن. كمان في شئ لفت نظري بيتقال عني تنكه ومغرورة لاني بقيت برفض اتعرف علي ناس كتيره بشكل اقوي من التعارف العادي , بمعني ان ممكن اتعرف علي حد والشخص دا يرغب بصداقتي وانا ارفض الصداقه دي ... طيب ما انا برفضها ليه؟؟ لاني مش مرتاحه ليها ودي نفطة مهمه بجانب ان انا عندي اصدقاء حقيقين مش عايزه اي اصدقاء جدد ,معنديش وقت اديهم حاجة ومعنديش طاقة او مجهود , فا بقي تهربي او رفضي او تمنعي غرور وتكبر وتناكه في وقت اني بوضح ليه معنديش استعداد لاي صداقه جديدة, وبرغم ذلك بيتقال معقدة .

فاجأة كل دا حولني لعملة تحمل وجهيين لا يتقابلان ابداً .... أحب اوضح نقطة مهمه عشان نوصل للمختصر المفيد, للمره الديشليون التحرر والتحجر ... لا باللبس ولا باللدين ... لكنهم بالاخلاق والفكر السليم .