close mind, open mind and free mind

 سؤال بتسأله كل يوم هو أنا إية ؟؟ ( close mind أو open mind ) ولما اسأل إيه معني الكلمتين بالنسبة للشخص اللي قصادي يا إما بيكون مش عارف يجاوب يا إما بيقول كلام غير مفهوم يا إما يقول لي تعريف أفهم منه إنه بيدور علي واحده تكون FREE MIND .

للآسف مجتمعنا العربي مش عارف يفرق بين ثلاثة توبيكات مهمه, ومش قادر يميز هو إيه او عايز إيه!! يعني تلاقي الواحد من دول بيقول علي نفسه انا Open mind ولما تتعامل معاه تكتشف انه بلاص مايند Balas mind ماركة من خلف الجموسة زوقيني, لا والانقح من دول ودول اللي بيقول علي نفسة Free وتلاقيه اصلا لا هو فريه ولا موريه حتي . والكلام موجه للبنات أيضاُ

عزيزي القارئ عزيزتي القارئة بكل تواضع إسمحوا لي بشرح وتوضيح لفرق بين كلمة Open mind و Free mind , ال Open mind تعرفها الاصلي عقل متفتح متعلم وناضج ومثقف, له أسس وعقيدة ثابته وقابل للتجديد بما يناسب عاداته وتقاليده وشخصيته ومعتقداته الدينيه والشخصية. 

أما ال Free mind فا دي معناها التحرر والتحرر هنا اطلقوه الاوروبين والامريكان علي الشخصيات إلي بتتحرر من البراويز التلاته وهي ال دين او الكنيسة او المعبد, الاخلاق و المجتمع. 

يعني لما واحده تلبس ميكرو جيب وبادي كاب وتحط مكياج صارخ بيقولوا عليها دي متحرره, لما تسمح لاولادها انهم يشربوا من صغرهم مثلا سجاير ويلبسوا اللي هما عايزينه ويسهروا وحاجات كتيره غير مناسبة لسنهم بيقولوا عنها متحررة. 

دا المعني الصحيح للكلمتين ... بالنسبة لشبابنا المثقف المتعلم الحلو المتنور اللي عايز يتجاب في ميدان عام ويتحرق بجاز او يتطخ برصاص, بيترجم الحرية والتحضر والعولمة واللبراليه بالسرير . 

يعني تلاقي الشاب من دول بيدور علي بنت تكون حلوة, تقدر تخرج بره بيتها 24 ساعة, تصاحب وتعيش علاقة زاي الاجانب دا حتي طلع مصطلح جديد ( هو كان ارتباط عربي ولا اجنبي؟؟ ). وتتفاجئ ان بقي في حياة كل شاب عربي إمرأة اجنبيه وبينسي ان زاي ما دخلت الاجنبية حياتك دخل الاجنبي حياة الفتاة العربية بأي صورة او شكل أو مفهوم , والمشكلة اللي بيجي يطالب إنه يعيش علاقة زاي علاقات الاجانب مش فاهم إيه هي العلاقة اصلاً او معني كلمة ارتباط او مسؤلية وبيطلب وبيطالب بشئ هو اصلاً مش قده ولا عارفه ولا فهمه وبيعيشه هيلهيلي كده وبيتأمر كمان. 

عزيزي القارئ العلاقة الكاملة اللي انت بتطالب بيها دي قبل ما يكون في اي زواج او شئ رسمي زايها زاي الزواج العرفي اللي هو عبارة عن سرقة او دعارة. 

أنا مش ضد الارتباط لكني ضد الازدواجية الشاب اللي بيطالب بعلاقة وارتباط زاي الفرنجة هو هو اللي بتلاقيه اول ما بيتجوز بيدور علي واحده مفيش مخلوق لمسها ولكن انا حابه اقول شئ لكل إنسان عنده هذا الفكر, قال الله تعالي في كتابة العزيز وفيما معناه ( ان الطيبون للطيبات والخبيثين للخبيثات والزاني لا ينكح إلا زانيه مثله) . وهو دا العدل

عزيزتي القارئة إحذري عندما يسألك الشاب انتي أوبن مايند ولا كلوز مايند ؟؟ لانه بيسألك من الاخر انتي هاتديله اللي هو عايزة ولا لا؟ فا فكري مليون مره قبل ما تردي عليه, فكري مليون مره وانتي بتعرفي عن نفسك ... فقد تقعين في المشاكل بكلمة او كلمتين بدون ما تحسي.