شيش سمك

صباح الخير ... اليوم لطيف جداً اتمني أن يومكم يكون أحسن وأجمل ... اكيد انتم فاكرين اللي حصل لي امبارح وحالة الاشمئزاز اللي كانت صيباني واصراري علي اني مش هاكل أي فراخ تاني, بصراحة كل دا راح بعد 7 ساعات ... وعملتها شاورما كان عندي عيش لبناني وعندي طيحينية وعندي عندي مخلل وشطة وروحت مشوحه الفراخ الاول علي النار مع بصل وفلفل اخضر وطماطم ... كان طعمها كويس بس بصراحة كان ملحها قليل شوية لكني عوضته بالمخلل... اما اليوم فقررت أعمل طاجن سمك بس عملت حبه صغيرين جدا وعملت الباقي شيس سمك ... أيوة شيش سمك . 

لما نزلت عند الخضارية مكنتش عارفه انا هاعمل ايه؟ او عايزة اعمل ايه؟ كل اللي انا عارفاه ان انا عايزة اكل سمك وبس النهاردة بس لقتني بجيب بقي بطاطس ولما روحت البيت اعدت اسأل نفسي ... هاينفع احطها مع الطاجن ولا لا؟؟ هاتصلح ولا لا؟ بعدين قلت خلاص انا هاعملها لنفسي وطلعت البطاطساية قشرطها وغسلتها ونقعتها في الماية حبه ... بصيت للسمك لقيت عندي سبيط قلت حلو انا بحب اقليه بس ماليش مزاج النهاردة اني اقلي ودقيق والغوص الدنيا وخصوصي ان الماية مش مساعدة خالص قلت لنفسي انا مطلعه سبيط ومطلعه شوية جمبري صغيرين وشوية سمك باسا حلو طيب كده كده الكمية مش كتير لكني هاتحدي نفسي واشوف انا اقدر اعمل بيهم ايه؟؟ 
سلقت البطاطس في شوية ملح وكمون بس مش سلقه كامله عشان مش عايزاها تتهري علي الشواية ... خالتها اقرب اللي النضج الكامل لانها كده كده متقطعه صغير ولسه هاتبقي علي الشواية وجبت البصل كمان وروحت مقطعاه كبير واديته نص سلقه بس هو والفلفل كمان ... كل حاجة ادتها نص سلقه حتي السبيط الا الطماطم خالتها فريش ... جبت الشواية وروحت دهناها زيت والاسياخ الخشب وروحت دهناهم زيت وجبت الصالصا الجاهزه وتبلتها حطيت عليها شوية ملح صغيرين وشوية سكر صغيرين جدا وعليهم قرفي وفلفل اسود وركنتها علي جمب لحد ما حاجة الشيش تبرد شوية .
جبت الحاله الوسط وقطعت فيها بصل وقرن فلفل وحيد واعدت اشوحهم مع زيت الذرة كويس جدا علي نار هادية لحد ما البصله طريت وبعدين حطيت الصالصة اللي كنت عملاها وحطيت عليهم كمان معلقتين معجون طماطم لاني بحبها تبقي حامره زاي الدم وفضلت اقلب اقلب اقلب علي نار هادية لحد ما عرفت انها اتسبكت وتعرفي ازاي انها اتسبكت بقي؟؟ بانك لما تشقي بالمعلقه الصلصة نصين ميجوش علي بعض يفضل كل نص لوحده (واخده بالك يا بسمة؟؟ ) وبعدين ضفت شوية سمك وشوية من الجمبري اللي بقاي علي حتيتن سبيط لاني خاليت اكتر السبيط للشيش ... الطاجن كان اكتره سمك ... سبتهم علي نار هادية مع بعض وبعدين روحت جايبه بقي حاجت الشيش ... طلعت البطاطس والجزر والبصل والفلفل والسبيط وبقيت امسك السيخ احط بطاطس بعدين جزر بعدين فلفل بعدين بص بعدين سبيط بعدين جمبري وبعدين سبيط كمان وبعدين الخضار دا كله تاني والكمية عاملت معايا 4 اسياخ خشب حلوين وحطيت عليهم الصوص اللي عملته وبعدين حطيتهم علي الشواية ورجعت تاني للطاجن جبت البقدون في الاخر وقطعته مفروم ناعم وقلبته مع الحاجة لاني محبتش يكون دبلان او يطبخ بدري بدري وجبت البرام الصغير وحطتهم في الفرن وهو كده كده هايكون مستوي بس انا بحب ان الوش يكون له لون مختلف كده وعشان هو مستوي انا شغلت الشواية اللي فوق بس مشغلتش اللي تحت عشان ميتلسعش وقلت لنفسي حلو قوي انا دلوقتي اعمل الرز ... بصراحة انا مبعرفش اعمل الرز المصري فاشله فيه جدا ومعملتهوش الا مره واحده اه الحمد لله كان طالع حلو بس مقدرتش افتكر الطريقة لاني عملته مره وكان كبريائي منعني اني اسأل حد واللي كان ممكن اسأله صحبتي الانتيم بس كانت نايمة وكل اللي حصل في المطبخ دا تخاريف نوووووووم اصلي قالبه ليلي نهار ونهاري ليلي وانتيمتي كذلك بس بقت هي تنام قبل مني بساعتين تلاته ههههه ( مش لو كنتي صاحية يا بسمة كنت سالتك؟؟ ) طبعا بسمة طلبت مني مجبش ليها سيرة الاكل خالص لانها بتعمل رجيم كميائي بس انا اديت الرجيم مليون صرمه ... المهم نرجع بقي للرز البسمتي قلت حلو انا نفسي فيه وبقي جاي في بوقي طعم الرز اللي امي الله يرحمها كانت بتعمله اعدت فجاة اصرخ واقول يااااااااااااااااااااااااااااااااااااااااااااختي انا مش فكره الرز البسمتي بيتعمل ازاي؟ انا بقالي زمن معملتهوش قلت يالي فتحت النت وطلعت الوصفه ...

 انقعي كوب ونصف رز بسمتي في ماء ساخن لمده ساعه
وبصله بردو متوسطه الحجم مبشوره
مكعب مرقه دجاج انا بستعمل ماجي ملحها بالنسبة ليا كويس وروحت حاطه حاطه الرز المنقوع مع 4 معالق زيت ذره والبصل بس كنت شوحت البصلاية نص تشويحة ودا من عندي وسبته يغلي ويشرب مايته وفتكرت كان صوت امي جيه رن في ودني وهي بتقولي الرز البسمتي مش عايز كل شوية يتفتح عليه او يتقلب عشان ميعجنش وافتكرت بعد شوية ان لازم احط الصاجة والحمد لله حطتها ... كله استوي الحمد لله الرز طلع كويس بس ملحه قليل مش مشكله لان بالصدفة اكتشفت ان الطاجن كان ملحه ظاهر سنه فا عملوا موازنه والشيش قبل ما اشيله من الشواية عصرت عليه ليمون ومش قدره اقول ليكم وااااااااو يعني ما شاء الله عليه اكلت حبه من دا وحبه من دا وشلت الباقي في الفريزر ... معملتش كمية كبيره لا رز ولا سمك ولا اي حاجة واتعمدت اعمل كده عشان مفيش حاجة تبات معملتش سلطة لكني قطعت شوية جرجير وخيار عشان يبقي في حاجة طازة خضره جمب الاكل . 

كان نقصني سيفن اب دايت وصحبتي بسمة عشان تدوق الاكل معاها بيبقي شئ تاني بصراحة بسمة هي اللي بتشجعني علي الاختراع لانها بتدون ومبيهمهاش وكل حاجة بعملها بتعجبها حتي لو مش عجباني بس بتعجبها لانها بتقولي كفاية انك وقفتي تعمليها .

ان شاء الله لما بسمة تجيلي هاعملها حاجة حلوة زاي كده واحلي كمان.

اتمني ان الوصفة تعجبكم ... وبصراحة مش عارفه اقولكم ايه؟؟ المواعين بقي يعني جبلللل  وعندي كسل غبي مخليني مش عايزة اغسلها ... ربنا يعيني.

تجربتي الدجاجية

أنا مش قدره اقول ليكم احساسي أيه دلوقتي؟ جسمي كله مقشعر وكل اللي طالع عليا" ياااااااااااااااااااختي "... النهاردة قلت نفسي أنا ليه معملش فرخة محشية فريك وجبت الفريك والفراخ سيارا وسبتها تفك تلجها وكل شئ بس لما جيت أغسلها بقيت عماله اقول لنفسي شكلها مش مشجع بمنظر الدهون والزلموكه دي معرفش إيه اللي حصلي جيت اقطعها بقي اول ما حطيت المقص عشان اقص الجلد واشيله معرفش إيه اللي جرالي كأن جبل واتحط فوق كتافي وبقي عندي احساس القئ بشع ... بعدين فجأة حاسيت ان الفرخة هاتقوم زاي الزومبييز وتخنقني بجناحتها المسلوخة أأأأأأأأأأأأأأأأأأأأأأأأأأأأأ احساس بشع جدا والله انا دماغي لفت من الاحساس اللي مريت بيه وكل اللي طالع عليَّ وهي الفراخ البانية مالها؟ كووووووخه !!!
حاسه ان من المنظر ظهري بذات نفسه وجعني مش عارفه ليه؟؟ ... المهم الخطة اتغيرت قررت أعمل ... مش عارفه انا هاعمل ايه بصراحة لما اعمل هارجع واقول ليكم .
ادعولي ان الاحساس دا يروح مني عشان اعرف ابدع

إحساس الشبع

كان يراقبني وأنا لا أدري عنه كان يعرف تلهفي القوي نحو الطعام النظيف والشراب اللذيذ, أردتُ أن أتذوق ذلك الشئ المدعوا " كوكتيل " الا ان امعائي اعتادت علي سندوتشات الفول والطعمية.

رأي فقري جيداً رأه بوضوح شديد بداية من الحشرات في رأسي حتي تلك الطبقة الاسفلتيه المصنعة من جلد قدمي وبالاخص ذلك التشقق كان شعور الحذاء او الشبشب بقدمي غريب اعتدتُ أن اسير حافية القدمين مني إلي الارض مباشرة فليس لي مكاناً غيرها أنام عليها وأكل عليها وأجلس عليها وأسير عليها الشوارع هي أسمي والارض هي أمي.

سألني عن ماضيَ أخبرته بدون خجل مادام كل ما يحتاجة مني قصص فلما ابخل عليه ولو احتاج اكتر لن أعترض فهذا ما املك وهذا ما يريده البعض أحياناً....

 أخبرته بدون خجل عن المرأة التي قابلتها منذ أربعة أعوام كانت افضل ما حدث لي عرضت عليَّ أن احمل لها بطفل من رجل ستجعله يعاشرني وقد راعتني وكانت شديدة الكرم معي أعطيتها مولود جميل لم احاول الكفاح للاحتفاظ به فأنا كما يقولون عني" يادوب عايشة بالعافية " لن أحضر لنفسي عله علي عيلتي في بيت تلك المرأة رأيت للمره الاولي ذلك الشئ المدعوا ديك رومي وتعرفت للمره الاولي علي طاجن سمك صيديه مازلت اشعر بطعمة في فمي لقد فعلت معي ما تفعله معي انت الان الا انني كنت أعلم بما ارادته مني ومازلت اجهل نواياك ولكن لا يهم مادام تشبع امعائي لا شئ يهم الا انني لم ارحمها من الدعاء عليا فبعد حصولها علي الطفل القت بي مجدداً إلي الشارع كان باستطاعتها الاحتفاظ بي وكنت سأعطيها اطفال اكثر كما تريد.

جميع الرجال قبله اطعموني الكباب ويأخذوني لشققهم او فنادق رخيصة يأخذون ما يُريدون ويرحلون ولكنه كان الغريب لمدة أسبوع وهو يطعمني ويغذيني ويقوي بنيتي اخشي ان اعتاده فيختفي.

حتي تلك الليلة أعطاني دجاجة محمره في السمن البلدي بعد ان اخذت حماماً ساخن في شقته وقال لي " كُليها " وفجأة شعرتُ وكأن روحي تقتلع مني وجدتُ صعوبة في التنفس كانت الكلمات تختنق بداخلي اردت ان اقول له توقف الا انني فقدت صوتي ظننتي رحلت عندما غرز أنيابة في عنقي.

الا انني ولدت من جديد في هيئة جديدة وعلمني أهم درس " عشان تشبعي جوعك اختاري فريستك صح....كل ما زاد الشق في رجليه او رجليها كل ما كان سهل عليه يبيع".

طبق لحمة

من أمبارح وانا هافف عليَّ الابداع المطبخي بما اني بقالي فتره طووووووووويييييييييييللللللللة مدخلتش المطبخ, كنت خايفة بس قلت مش مشكلة انا قدها ومن الصبح طعم الفلفل والبصل المشوي بس يكون محطوط له زيت زيتون بقي. 

فتحت التلاجة واعدت اشوف انا عندي ايه ؟؟ بصل موجود تمام وفلفل اخضر موجود حلو وطماطم موجودة الحمد لله عيش فرنساوي بحبه موجود هايل وعندي لحمة مفرومة راااااااائع جداً, قطعت البصل الاول لشرائح بالطول والفلفل كمان والطماطم قطعتها بالطول كل اللي استخدمته عشان الكمية تكون معقوله وتنفع شخص او اتنين بالكتير وعلي الغداء وميتبقاش منها حاجة لاتاحة عمل شئ جديد علي العشاء, استعملت بصلاية كبيرة وفلفلتين وسط وطمطماية وسط وربع كيلو لحمة مفرومة .

طبعا الكمية اللي هاتحطيها أكتر من كده هاتحطي معلقة كبيرة زيت درة او زيت زتون او عباد الشمس أنا عن ذات نفسي حطيت زيت درة عافية  وعلي نار هادية جدا الاول حطيت البصل وفضلت اقلب فيه لمدة من 5 الي 7 دقائق وبعدين قطعت الفلفل وحطيته عليه وفضلت برضك اقلب اقلب لحد ما لون البصله بقي بيج شوية ولقيت الفلفلة طريت في الوقت دا انا كنت ناقعة اللحمة المفرومه في ماية بصل بعدين طلعي اللحمة من ماية البصل وضيفيها علي البصل والفلفل وقطعي الطماطم وحطيها وقلبيهم مع بعض وبعد شوية حطي شقشوق ماية عشان متضيف زيت تاني والاكل ميزلقش منك. وكل دا والطاسة بتاعتك او الحله علي ناااار هادية جداً. 
بعد كده التتبيله انا حطيت شوية ملح وشوية خل وشوية فلفل اسود وشوية كمون ومتكتريش عشان تحسي بطعم الفلفل الاخضر مع اللحمة ... ممكن اكيد تضيفي حاجات انتي حباها جزر او فلفل ملون وممكن كل دا وزتون اخضر واسود بس الاول انقعيه واغسليه من ملحة كويس .

جمب منه بقي عملت سلطة خفيفة مكونة من جرجير كتير وبقدونس وكرونب احمر ... الكرونب الاحمر قطعيه رفيييع جدا وصغير وقطعي البقدونس والجرجير صغير وابشري جزراية وخياراية وطمطماية صغيره وحطي بقي حاجة من اتنين يا صوص متكون من زيت وخل ولمون او صوص السيزر انا استعملت صوص السيزر وهتلاقيه في أي ماركت من الكبار. 

مش هاتحتاجي اي رز او مكرونة جمبها للتغير كوليها بعيش فرنساوي.

Italian Ice بتاعي

أنا في الاونة الاخيرة بعاني من زيادة في الوزن وعمالي حالة نفسية سيئة جداً وبدل ما احلها بالعكس انا بزدها وكمان الاحوال اللي محيطة بيا كمان عاملة تأثير قوي بصراحة ومتعودش إني استسلم للاحساس دا أكتر ولكني بحاول علي قد ما اقدر اخرج نفسي خارج الدايرة دي واتحكم في وزني الزائد باني اعمل حاجة من أتنين يا اقلل منه يا اني مزدش أكتر... 

احنا في الصيف والدنيا حر وكلنا عايزين حاجات باردة اكتر وايس كريم وحوارات من دي اللي بتودينا خلف الشمس وبتدينا شعور سئ بعد فتره, كنت بكلم زوجة صديق ليا من أيام الجامعة وهما دلوقتي عايشين في امريكا وقلت ليها علي اساس اني بخترع بس والله كنت فكراه اختراع معرفش انه موجود اصلا وبكل ثقة وانا متعنطزه كده " اسكتتتتتتتتتي يا ريمي مش انا عملت ايس كريم في البيت قليل السعرات الحرارية بس تحفة " 
ريمي :- لا والله ازاي ؟ علميني تكسبي فيا ثواب ..
أنا :- طبعا يا حبيبتي هاتي الفاكهة الطازة اللي انتي بتحبيها او مجموعة فواكهه يعني مثلا هانتخار المانجو ... هاتي منجاية كبيره وعصير مانجو وتللج واشريهم حلو جدا مع بعض لحد ما يطحنوا ناااااااااعم جدا وبعدين حطيهم في الفريزر المفروض ان الشكل النهائي يكون كده ... 
وروحت بعتالها صورة 

راحت كبساني وبطاني ومحرجاني وقالت لي " احنا عندنا دا في امريكا واسمه Italian Ice " وبدأت تسألني انا جبت منين الطريقة وعرفت ازاي الطريقه؟؟ قلت ليها ابدا انا اعدت افكر وامخمخ واصلا انا كنت عايزة اعمل فريسكاتوا وقلت ان الفريسكاتوا دا في الاساس عباره عن تلج وعصير واكيد حاطين معاه فواكة ولو نسبه بسيطة؟؟ 
ومن هنا بدات اجرب كذا حاجة بصراحة انا عجبني اخر حاجة عملتها جبت عصير كوكتيل بتاع سيزر وجبت موزه وتفاحه وعنب وكريز واناناس وضربتهم مع بعض كويس ومع تلج لحد ما نعموا بس مش قدرة اقول ليكم واااااو بجد بصراحة ... وطلعت من ع النت طرق جديدة وكتيره اكتبوا Italian Ice علي جوجل وهايطلع ليكم حاجات كتيره .. هو في ناس بتضيف عليه سكر لكن انا لاء مش بضيف بس دا يرجع لرغبتكم انتم .

سيدي الرئيس

سيدي الرئيس مرسي... 

بعد السلام والتحية. أعتذر سيدي فرسالتي مليئة بالأخطاء الاملائية الفادحة والاخطاء اللغوية, معلش متخودهاش عليَّ لكن حاول تفهم غرضي الشريف وصدقني وأنت بتقراها دا لو حضرتك في يوم من الايام قراتها هاتعرف انها للشعب كمان مش ليك لوحدك, سيدي الرئيس أنا مواطن انوي لا يفهم شئ في السياسة لا قبل عهد ولا بعده ومهما حاولت افهم او اتكلم اهلي هايسكتوني لانهم بيخافوا عليا ودا حقهم لان بصراحة لسه مشفوش ميتك ولا عرفوا نواياك الحقيقية وبصراحة لو شافوا التدوينة دي هايصوتوا ويلطموا عليا.

سيدي إحنا عايزين نرفع البلد دي ونتقدم بيها واكيد وانا متأكده ان اللي هاريفعها معاك نحن أيون الشعب, محتاجين يا سيادة الريس شوية توعية الشعب لازم يعرف عليه ايه؟؟ ويعرف عليك ايه؟؟ ولازم كمان يفهم حاجة ان لما نحط ايدينا في ايديك هانعمل شئ للمستقبل. بس كمان عايزينك تحسبها صح أبوس ايديك اخرس جماعة الاخوان اللي بتتكلم عن لسانك لانك دلوقتي لا تنتمي إلي أي جماعة أنت الان تنتمي إلي مصر وكلنا ننتمي إلي مصر, ولذلك لازم كلنا نعمل في صالح مصر. 

سيدي احنا عايزين نعيد كتابة القانون من اول تاني وجديد بعد اذنك لو سمحت, عايزين يكون في قانون حاسم لحماية الاطفال وقانون لحماية المرأة وقانون لحماية الرجل, لازم الشرطة تعمل في خدمة الشعب وليس في تكفير الشعب والشعب يعمل علي ضربهم بالجذمة, سيدي لازم يبقي في قانون زاي بتاع الولايات المتحده دا لو واحد او واحده بعتت مسج فيها مسبه او اهانة لحد يتسجن والمقصود بمسج هنا علي الموبايل او الاميل او الفيس بوك, لازم يا سيدي يكون في قانون يمنع العنف في المنازل ويتيح فرصة للطفل انه يعيش حياة سوية والعنف مش لازم يكون بالضرب ممكن بالكلام.

سيدي لازم تعيد تشكيل معني وشكل المدارس الحكومية ولازم تنظر في شكل المواد التي تقدم للطفل وتسبب له تأخر فكري وتأرجح عقلي, سيدي مدارس الحكومة روادها يحملون عنوان ( بصمجي بيعرف يفك الخط ), لازم تغير شكل المدارس دي لانها مش مدارس دي وباء فعلا ولازم تدخل الرياضة ضمن المنهج مش تتراح لحصة العلوم والعربي والانجليزي ولازم كمان تنظر في حوار مدرسين الانجليزي دول لانهم مبيعرفوش انجليزي اصلا حضرتك. 

سيدي الرئيس حضرتك لو بتتفرج علي برنامج خواطر اللي بيجي علي mbc 1 كل سنة في رمضان لمدة نص ساعة ومتلحقش تفهم الحلقة بدايتها فين ونهايتها فين بسبب الضغط اللي بيجيلك من جمال وتقدم البلاد الاخري, سيدي علي اليوتيوب واتفرج هاتعرف انا عايزة اقول ايه من الاخر. 

سيدي ارجوك انت لازم تعمل كنترول علي القنوات الدينية الاسلامية والمسيحية اللي بتنشر اشاعات وفتن طائفية جوه الامة والوطن ارحمنا منهم وطهرنا, لازم يكون عندنا اعلام نظيف.

سيدي اعطيهم حرية واعطيهم مايريدون ولكن بالقاااااااانون ... كل شئ هايتحل بالقانون. 

انا كمان بطالب رجال الاعمال خلوا عند اهاليكم شوية دم وبدل ما الراجل يروح يستلف من بره عشان ينهض البلد دي ساعدووووه استسمروا فلوسكم فيها, اعملوا حاجة عدلة لاخرتكم بدل ما انتم منتمين قوي كده لاوروبا اهو حسني راح بح معدش في ديكتاتور وروني هاتعملوا ايه بقي ... ما تشوفوا دونالد ترامب بيعمل ايه لبلده عشان يحسنها ويوقفها علي رجلها ما تتعلموا منه ولا هو كخة تتعلموا منه يعني .

الاخوه الفنانين كونوا قدوة حسنة دا كل اللي اقدر اقوله.

الشعب ابدأ بنفسك لو بدأت بنفسك وركزت مع نفسك ونسيت اللي حوالين منك هاترتاح ... بتطلب من الشرطة تديك امن وامان وانت اصلا اللي بتعمل التخريب يعني بتروح تعاكس في بنات الناس وتتحرش بيهم وبتتحرش باختك وانت اصلا مش دريان ... عايزين نقف علي رجلينا وبندأ صح.

سيدي الرئيس مرسي في النهاية احب اقولك ان انا مخلصتش كلامي ومطلعتش كل اللي جواية بس يمكن الله اعلم في يوم من الايام نتقابل واعرف اعرض عليك وجهة نظري صح وبوضوح اكتر...

مع خالص حبي ...
مواطنة انوية .

مهلبية

وقفت قصاد سريري المتنعكش واللي متروقش من 3 أيام, لقيت نفسي بفكر يا تري أروقة ولا لا؟ أنضف الاوضة دي ولا لا؟ انا مبشوفهاش الا لما باجي انام بس طب إية ؟؟ قلت خلاص أنا بالريشة واهش الغبره والارض وشفطها والسرير اعدل الملايه واطبق اللحاف ( أيوة لحاف مبعرفش انام من غيره ) وأنا عماله اعمل العمل الشاق دا كنت بقول لنفسي " إية الدروس المستفادة من ترويق السرير؟؟ " يعني لما اروقة وانا اصلا بستخدمه بس في النوم ما انا لما اجي انام هانعكشه هو وجع دماغ وخلاص؟؟ ولا ارهاق لينا وبس مش فهمه بجد إية وجه الاستفادة هنا؟؟ حاجة متعبه يا اختي والله ... عارفين انا شخصية معفنه جدا اه والله يعني انا العائلة تروق وانا انعكش دا انا حتي لما بروق مكان بيصعب عليا اشوفه نضيف اروح منعكشاه تاني ودا حقيقي ومش بهزر والله وبسبب اللي انا فيه فعلا بفكر في المستقبل اللي مش عارفة هو قريب ولا بعيد إن في شقتي مش هاجيب الحاجات الغريبة اللي بشوفها في الشقق دي يعني مش عايزة بصراحة اتنين صالون ونيش دا كله كوووم وام النيش دا كوم مبنستخدمهوش الا في تخزين حاجات مبنستعملهاش اصلا!! واجيب حاجة مش هاستعملها ليه؟؟ وبعدين مش عايزة انا صالونات والكلام دا كفاية انتريه يعني دا حتي الصحاب اللي هايجوا يزورونا بيعدوا في الانتريه مش في الصالون انا بحس ان الصالون دا مشروع فاشل أي والله, عارفين كان عندي مدرس تاريخ ايام الثانوي كنت بروح اخد عنده درس مع بنته لقيته مبيأعدش عياله في الصالون وقافل عليه بالمفتاح والصالون دا للضيوف وبس ولما سألت البت مين هما الضيوف اللي بيجولكم ؟؟ قالت لي اقاربنا وبيجولكم كام مره في الشهر؟؟؟ قالت لي قولي كام مره في السنة؟؟ الله يعني نظريتي صح!!

مش هاعمل منشر في البلكونه عشان انشر الغسيل من هنا اقوم مدخلاه الغسالة من هنا المنشر هايكون جوه البيت ومش هاعمل شبابيك عشان اكيد العماير اللي حوالين مني هاتبقي اعده اكيد معايا وانا ماليش خلق بصراحة لكده معرفش ليه وانا بكتب الجملتين دول لقيت نفسي بقول لنفسي ( وانا اعيش ليه اصلا؟؟ ) لما كله مليان عيوب كده.
ااااااه والبوتجاز ... البوتجاز وفرن البوتجاز والميكرويف والفرن الكهربا انا عن ذات نفسي يا ابن الحلال متفكرررررش لا في محشي ولا مومبارات ولا كلام كتير من دا, هانقضيها مطاااااااااااعم وفووووووول وطعمية جاهز قولونك انا عن ذات نفسي مجهزاااااه.

بس بجد بجد والله مع حالتي دي مش عايزة حاجة كبيرة تخنقني صالة وغرفة نوم ومطبخ وحمام حلووووووووووين قوي قوي قوي قوي بعدين بقي لما اعرف اتخلص من جينات الكسل نبقي نجيب شقة كبيره او من الاحسن تاخدها من قصرها يا ابن الحلال ولا تتعب نفسك ولا تتعبني هااااه لحسن زهقت بقي من التفكير في حلول للمشكلة دي.

برضك حاجة مش عارفه افهمها المواعين ... يعني ايه اروح اشتري 3 او 4 اطقمة سفره وادوات اكل ومطبخ وفي الاخر كل اللي بنستعمله من كل الليلة دي طبقين ومعلقتين وشوكتين وسكينتين وحلقة للرز وحلة للخضار وطاصه ... يعني من ام الليلة دي كلها مبنستعملش الا من كل حاجة اتنين لحد بقي مانخلف دا لو مطلقناش بعد ما مسكنا في شعور بعض.

كان عندي صديقه مره بتحكيلي عن ابوها اللي بتشوفه كل كام قرن مره, انه زاي حالاتي كده وعشان يكبر دماغة لانه بقي عازب باااااع فيلتهم وجاب استوديو وحتي راااااح فارش الارض كلها موكت عشان يكبر دماغة وكل ما الموكت دا شكله يعفن يروح مغيره وجايب غيره ... انا بقي لالالالالاء انا هاعمل بلاط واللللخص الدنيا اريح يا عم.

من الحاجات برضك اللي مش هاستغني عنها لونها مش موجوده عندي دلوقتي غسااالة الاطبااااااق اصل غسيل المواعين دا مش مهمتي وبالاخص اني بلاقي الحاجة محتاجلها غسلتين تلاته تاني ... ياااااااااه فعلا تنظيف البيت دا فن واحساس والاحساس دا مش موجود عندي والفن دا بصري متعود ع النعكشة في غيري هايقول كلمة وساخة او زبالة لكن في النهاية تصب في معني واااااااااااااااااااااااااحد.

بصراحة انا لحد هنا ومش عندي كلمة اقولها لكن كل اللي عايزاة حالا كباية نسكافية سلالالالالالالام.

جوه القفص

بنات كتيرة سألتني في الاونة الاخيرة أن ليه بقالي فتره مبكتبش موضوع حقيقي او كويس زاي ما هما متعودين مني وبيكون ردي زاي كل مره { مش لقية حاجة اكتب عنها او اتكلم فيها ووقت ما هلاقي حاااااااااااااااااضر هاكتب }, بصراحة بقالي كام يوم في كذا موضوع عايزة اتكلم عنهم, منهم " ليه الشاب اللي بيعمل relationship status بيعملها خاصة يعني البنت اللي مرتبط بيها هي لوحدها اللي تشوفها " بس بصراحة معرفتش أكتب عنه لان أنا مش شاب ومدخلتش في نفسية الشاب من جوة أو عقله الباطن أو دماغة أنا حتي معرفش هو ممكن بيكون بيفكر ازاي وفي ايه؟؟ لكن كل اللي اقدر اقوله من وجهة نظري كا بنت هاحكم عليه ازاي ؟؟ انه دا عايز يرح دماغة من زن البنت دي فا بيديها العضمة إلي هاتريحها وتسكتها وتخليها تكبر دماغها وتفتكر انه كده بيعمل الحصل وان اي حاجة بتحصل بعد كده علي عينك يتاجر في حين انه في الواقع بيلعب عليها وبيخدعها وهي متعرفش, وكمان هاترجمها ان اللي بيحصل بنهم دا واحد واخده جد والتاني هزار, يعني كده من الاخر لو اكتشفتي ان اللي انتي مرتبطه بيه او مخطوبة له او متجوزاه عامل الاستيتوس دي انتي بس اللي تشوفيها سيبيه يا بنت الحلال قبل ما هو يسيبك وهاتي كتاب نسيانكم لاحلام مستغانمي واقريه يا أمي وجمب منك كام علبة مناديل زين العائلية وعيشي مع اغنية ماجدة الرومي " لا أنا لن أعود " عشان تديكي دفعة قوية من الشجاعة والاصرار ولمعلوماتك انا بعمل كده, لما بتسك علي قفايا من أي حد والله بروح جايبه كتاب النسيان دا واروح مشغلة لا انا لن اعود وبضيف ليهم الشوكولاته والنسكافية عشان تروق من أعصابي. 

الموضوع بقي إللي عايزة أتكلم فيه هو ... بس قبل ما قول هو انا عايزة احكي حكاية افتكرتها دلوقتي هي مش حكاية حكاية مش عارفه بصراحة هي إيه؟ بس هو موضوع مهم جداً ... انا امبارح صديقتي العزيزة هند ... علي فكره يا هند احنا السنادي يبقي بقالنا 6 سنين نعرف بعض وبفتخر جدا انك صحبتي ربنا ما يحرمني منك يا رب ... المهم الحكاية ان هند كانت بتحكيلي امبارح عن حد هي تعرفة و البنت دي بيتقدم ليها خطاب كتير من اشكال والوان وكان من اللي جوم يتقدموا ليها واحد كان بيشتغل في بلد بس مش فكره ايه هو بس شكله اجني والواد بيجي مصر يتقدم لبنات الناس ويكتب عليهم ويتجوزهم وبعدين يطلقهم أل ايييييييييييييييه؟؟ اصله بعد ماحصل اللي حصل اكتشف ان مشاعره مش حقيقية وانه كان لازم يتجوزهم عشان يعرف مشاعره حقيقية ولا لا؟ عشان ميبقاش ميحبش يبقي في حاجة في الحرام... المهم البنت دي عرفت ازاي بقي بحقيقة الولد دا؟؟ لما كلمة واحد قريب منهم وهو يعرفه كويس قالها اوعي دا اه صحبي واه هو بيشتغل كويس لكن دا كان متجوز مرتين قبل كده وحكالهم الحدوته الصغيرة دي وطبعا هو كان قايل ليهم انه خطب مره قبل كده بس.
بصراحة مقدرتش اتمالك اعصابي برغم ان هند طلبت مني اتمالك اعصابي, لكن لقيت نفسي بنفجر وانا بتخيل ان دا ممكن يحصل معايا او مع اختي الصغيرة, إحساس زبالة قوي وأنت مقلق من اللي دخلين بيتك... مش هاتكلم عن الحوار دا اكتر لان انا لسه راسي سخنه منه من امبارح بدرجة انه جالي في الحلم.

الموضوع بقي إللي أنا عايزة اتكلم فيه موضوع مهم جدا أي وهو, الستات لما بتضايق الرجالة مبتتحملش كلامهم, ودا اكتشفته من مسلسل أمريكي انا بتابعه علي التليفزيون, بيتكلم عن قصة اتنين تخان جدا وقعوا في حب بعض ومع الوقت بيتفهموا مع بعض وبيحبوا بعض والمفروض ان في النهاية بيتجوزوا وكمان بيوضح علاقة الشاب باهله ومع اهل حبيبته وعلاقة البنت مع الشاب ومع اهلها ومع اهل حبيبها... وكان في حته فحلقة اليوم ان ازاي موضوع مضايقها جدا ومعصبها جدا هو متحملش يسمعها واعتبر ان هي كده بتنكد عليه في وقت ان هو لما كان مضايق ومتعصب انفجر وياها وكان بيس وكول بالنسبة ليها وتحملته, الموقف دا خلاني اتوقف عنده وافكر في كلام أمل محمود من كتاب " عشان الصنارة تغمز " انا مش فكره كلامها حرفياً بس كانت فعلا بتتكلم عن ان الراجل مبيتحملش الكلام دا, طيب الراجل بيتحمل ايه؟؟ مش فهمه بصراحة, لا هو بيتحملها وهي بتشتكي ولا هو بيتحملها وقت ما بتغلط ولا هو بيتحملها وقت ما بتتخن تحت أي ظرف كان ولا هو بيتحملها وقت ما بتكتئب ولا بيتحملها وقت ما بتنشغل عنه بسبب شغلها او دراستها او الاولاد يبقي ايه؟؟ هايتحملها امتي ؟؟ ماهي مش طول الوقت اعده لسيدته متمكيجة ومستنياه ومتبسمه ومحضره الطشت عشان تنزل تحت رجلية ( الكلمتين اللي فاتو دول مش حقيقة دي مبالغة مني بسبب الانفعال مفيش واحده بقت بتعد تستناه بالطشت ).
بجد مش قدره افهم سيكولوجية الرجل هو المفروض اقرا ايه عشان افهم الرجل؟؟ يعني كتاب Love SMART و عشان الصنارة تغمز و Act like a lady think like a man  خلاص بصمته وهو اصلا ميختلفش شئ عن كتاب دكتور فيل اللي في الاخر بيقول ليها ان 100% من الرجال بتقول كلمة بحبك لكن 20% بيحسوا بيها و 90% من الرجال بتقول كلمة تتجوزيني لكن اللي بيتكلمها وبيطلبها بجد 5% واللي بينفذها ومستعد يستمر في الجوازه دي 1,5%. 
تفتكري ان بعد كل الاحصائيات دي أنتي مستنيه ايه؟؟ او متوقعه ايه؟؟ 
أنا عن ذات نفسي مش متوقعه شئ... واللي لازم اعمله اني اعتمد علي نفسي ومحتجش لراجل يؤمن لي احتياجاتي ... برغم كده انا مش عارفه اعمل دا.

العيد

التنظيف اللي بيكون في اخر خمسة أيام في رمضان للعيد وبس ... 

في العيد وبس بناخد عدية بالهبل ... فلوس كتير ... وحلويات كتير ... والعاب نشتريها كتيييير.

في العيد وبس اللامه بتاعت العائلة ...

ونبقي مع أصحبنا في الجونينه او الملاهي كده هون ... دا غير ان بنعد نكيد في بعض من هدومة احلي طبعا ودا بس في العيد..

في العيد وبس البومب والبلالين ليهم دووووور مهم جدا واغنية اهلا اهلا بالعيد ...

في العيد بس كل البنات بتواجه خطر ... الكحك والبيتي فور والبسكويت والقراميش.

في العيد وبس البنات بيبقي نفسها تبقي كده ...

بس الواقع انها مبتغادرش جزيرة القطن وبتبقي كده في العيد ...

وفي بنات بقي وشباب بيكون العيد عندهم كده ...

لكن مهما كان شكل العيد ايه؟؟ بتعمل فيه ايه؟؟ وبتتصرف فيه ازاي؟؟ الا ان في النهاية احب اقولك ... 

العيد عبارة عن صورة كتيره انت بتخترها حاول تخلي البسمة حاجة أساسية فيها.

حداد علي الامة

منذ قليل زميل لي عرض عليَّ تدوينة وهو بيسألني رأي في النوت او التدوينة زاي ما بيقولوا وبصراحة انا من أول سطر شتمت اهل الكاتب ذات نفسة لانهم معرفوش يربوا ... اللي كاتب الكلام دا أسمة محروس أحمد وبصراحة مش مقتنعة بالاسم أسم غير مسمي يعني واحد يكتب نص المفروض انه أدبي ونقول اه دا فن وادب ونقول أصل دي موضة الادب دلوقتي, وهل الموضة توصل للتطاول علي دين الله ودينا الاسلام؟ 
بصراحة انا مقرأتش له قبل كده ومش عايزة اقرأ له لان كل حرف هقرأه هاخد عليه ذنب وهاتحرق بيه وانا مش نقصة وبعتذر اني اطريت اخودها كوبي واوريك التطاول عامل ازاي دا لو اعتبرتموه تطاول اصلا.


خامسة:
أطوف حول خصرك سبع،أسعى بين نهديك سبع؛ فأحدهما صفاي وليس إلا الآخر مرواي،أقبّل-بنهم- أحجارك،وأرمي جمراتي بأعين من يجرؤ على التفكير في النظر إلى طرف من أطراف كنز من كنوزك،أرفض طواف الوداع..!! ( الاخ بيتكلم عن مناسك الحج وبيوصفهم علي جسد الانثي ... دا ايه العهر دا يا جدع الله يحرق اهلك اللي معرفوش يربوك )

رابعة:
أصوم عن غيرك،وكالزاهد المتقشف أتصبّر بفتات فتاتك-تقوتاً-لحفظ انتظام تنفُس،طوال غيابك لا تغيب شموس صيامي،ولي فرحتان عند طلوع قمرك..فرحة لإفطاري بشفتيك وفرحة بلقياكِ لا تعادلها فرحة..!! ( الصيام لربنا بس يا ابن جهل )

ثالثة:
أُذكّي بذاتي،أبعثرها وروداً فوقك وأفرشها تراباً تحت أقدامك،أعبدك حق عبادتك فإن لم أكن أراكِ أعلم أنكِ تريني،أقرب إليّ-أنتِ-من حبل الوريد،عمري أمنحه صدقة، وحرماني منكِ جهاد في سبيلك..!! ( اهو اللي ذايك واشكالك هما اللي خالوا الادب وضيع وضيعوا الدين وخالونا في دوامة وسخة )

ثانية:
أصلي بمساجدك وكنائسك وأديرتك،ساقيتي أدعوكِ وأنا موقن من الاجابة،أتنسك بملامحك،أتعمّد بين ذراعيكِ،أترهبن بليل شعرك الطويل،
أتصوّف بقلبك، وأصير حَبَراً من أحبار عينيكِ..!!( ربنا يحرق امك وابوك اللي معلموكش ان مفيش مساجد علي الارض غير مساجد الله يا متطاول علي الدين ... انا لو اطول انعتك بالكفر كنت عملتها برغم انك نطقت الشهادة بحد تاني )

أولى:
أشهد ألاّ غيرك "إلهة الدلال والدلع"،
وحدُكِ..لا شريك لكِ.. ( الشهادة لا اله الا الله محمد رسول الله ) .

مما حدث

من الاحداث اللي احنا عايشنها ومن الفراغ هاحكلمكم كام ئلشة كده علي وزن لا دين له ولا وطن


الغباء لا دين له ولا وطن ( حد يسيب بنته كده؟ )

دم العربي الخفيف لا دين له ولا وطن ( طلعناهم حمير برضك )

سوكة لا دين لها او وطن ( جبتلكم سوكه بالعنجليزي والعربي )

وفي النهاية اقول الخراج بقي لا دين له ولا وطن :(


ملحوظة مهمه :- علي كل من يقرأ هذة التدوينة ان يكتب شئ يليق علي وزن لا دين له ولا وطن 
مثال :- الصداقة لا دين لها ولا وطن. 

ميرسي.

حكمة اليوم.

الأصحاب أصحاب ولو دخل بنهم الغراب والاهل اهل ولو اللي بنهم انعقد لكنه مع الوقت راح ينحل.

الحمد لله...

التدوينة دي اسمها الحمد لله ... انا كنت مهمومة قوي قوي والحمد لله بعد البركان دا كله ارتحت .... وحشتيني يا أمي وبتوحشيني وأنا مظلوم.

أنا كنت كده من كام ساعة ... لكني جريت علي صحابي عشان يحضنوني وفضفضت  وفي عز الاه تنحت وقلت لاء أنا تعبان لاني مظلوم وربنا هايجبلي حقي.

أنا كنت نايم كده  .... ومخنوق, عايز حقي ومش عارف أجيبه وبقول من جواية يا رب أنا لا ليا أم ولا ليا أب أنا ما عندي غيرك يا رب ... فاجأة سلاسل وحبال لقتها بتتحل من عليَّ.

قمت أعمل كده والنور مقطوع .... والنور جيه ولما جيه نسيت الموضوع. 

أصله موضوع عبيط ( تفاه تفاهت البنات وربنا )

المختصر المفيد..

برغم إني حزين ... لكني عارف لحزني نهاية ... ومع كل نهاية في بداية بتترسم ببسمة مرسومة علي الشفة ... تنور الوجة وتحلي الضحكة.

الدرس التاني

منذ أيام وأنا راغبة في كتابة الموضوع دا بحرقة وبقوة وبشدة وعنف, كل الناس إللي تعرفي وجه لوجه هاتقول إني بكتب الموضوع دا لاني بكره الرجالة, في الواقع أنا مش بكرهم ولا شئ ولكني مبقتش بحترمهم ونحن بقينا في زمن النساء هن القوامات علي الرجالة بأخلاقهم وعملهم وعلمهم. 

كانت صدمة بالنسبة ليا قوية جداً عندما قرأت رأي سياسي عربي معروف مبرر رفضة دخول المرأة العربية عالم السياسة والبرلمان قائلاً " مجتمعنا يسيطر علية الرجال والرجال أقدر من النساء, لم تطور النساء أنفسهن بعد, ولا يملكن ما يكفي من الخبرة كونهن ( توابع) لم يشغلن مراكز في السلطة كما يفعل الرجال" وقد اعرب أخر قائلاً مبرراً " أن المرأة مصدر إلهاء ووجودها في البرلمان فتنه في حد ذاته فقد تشغل احد النواب وتفتنه بملابسها فينشغل عن الجلسة بالنظر اللي ثديها وتفقد جسدها وقوامها". 

ان دل هذا الكلام إللي شئ فهو يدعل علي أن الرجال لم يعودوا الستار والسوتره ورب المنزل, بل هم ضعاف الشخصية أمام شهواتهم البشرية, يطالبوننا بالعفة والعفاف والشرف وهم يفتقرون له, يطالبوننا بالانوثة وهم أبعد ما يكونون من الرجولة, متجاهلين أن الرجول ليست بقدراته القوية أو ابداعة أثناء العلاقة الجسدية بقدر ما هي أخلاق أصيلة . أصبحت تلك الاخلاق تتمركز في النساء أكثر وأعمق وأقوي من الرجال. 

كم فتاة عبر الفيس بوك وغيره من مواقع كانت تبعث لها برسائل خليعة, والغريب أن أكثر من يرسل تلك الرسائل ذكور متزوجين, يطالب فيها أن تشاركة الفتاة بضع دقائق من اللذة. بل والادهش أن ذلك الذكر يلعب دور الرجولة أمام زوجتة ينهي ويأمر ويمرمط فيها ( كأنها الجارية اللي اشتراها ابوه ليه ).

الخيانة ... لا أسم لها ولا عنوان سوي الذكور ... حسبي الله ونعمة الوكيل.

منذ أيام كنت أستمع إلي أغاني أبو الليف الجديدة وقد أعجبت بشدة وبقوة بموضوعات الاغاني وما تحتويه من رسائل وكانت مبادرة قوية وحقيقة من أبو الليف يناشد فيها الذكور بالتغير ويعطي البنات الهبل درس عبر أغنيتن له " نينا هووو " و " بنت الناس ". 

شكراً أبو الليف لمساهمتك في التغير الاخلاق والوعي بين الشباب. 

لقد طفح بي الكيل منهم, يأمرورنا بالتغاضي عن ماضيهم ويفتحون لنا تحقيق عن ماضينا ويشيدون المحكمة ويصدرون الحكم بدون الاستماع إلي الدفاع او تقدير الموقف, يشعرونك بالذنب ويتبعون دائماُ أسلوب إللقاء اللوم علينا نحن لكني نلتهي بمشاكلنا وننسي مصايبهم الخفية... يصيبوني بالاشمئزاز عندما أقابل ( خالتي اللتاتة ) بينهم وكما اعتقد وكما أشعر الان لازم من تغير أسم خالتي اللتاتة دا إلي خالي اللتات بجد هايكون أكتر تعبيراً وأدق وصفاً بهم.

لكي تكون رجل في نظر الانثي ... لابد أن تكون الرجولة نابعة من جواك وبصدق ويجب أن تعرف أن شرفك بعيد عن الانثي تمام ونهائياً لان شرف الرجل كلمة والكلمة تحمل الكثير ... تحمل وعدك وصدقك ودينك وشئ هاتتحاسب عليه يوم الدين .

لما تعرف ازاي تحافظ علي كلامك أبقي تعالي حاسبني ...

كتاب معلق وأعتذار حقيقي

 من المعلن والمعروف عني بغضي للرجل في 99و999999 % من الحياة اليومية والمواقف التي تواجهني معهم, ولكن كتاب " الجريمة بأسم الشرف " جعلني أبغضهم أكثر وأكثر.


لم أنتهي بعد من الكتاب او الوصول حتي إلي نصفه, مازلت في الصفحة ال54 من أصل 266 صفحة, وشعرت بالخزي من المجتمع الاردني اللذي أنتمي له, فلقد كنت أتبجح متفاخره علي بعض الاشقاء العرب بثقافتي الاردنية القوية وبأردنيتي وبإحترام المجتمع الاردني للمرأة, ولكنني كنت مغيبه, عمياء وغير مثقفه إطلاقاُ...


صعقت عندما شُهرت أمامي حقيقة المجتمع الاردني, مجتمع عادي كأي مجتمع عربي أخر مصاب بإنفصام الشخصية والطبقية القاتلة والتميز الطبقي... للمرة الاولي حقاً أشعر بحقد كبير إتجاه مجتمعي. 


أيها المجتمع الاردني إنك تدين لي ولنسائك إعتذار ... ولن نصفح عنك حتي تُعيد لنا كبريائنا.


المجد وكل المجد لـ رنا الحسيني حقاُ. 


ملاحظة:- أرجوكم تلاوة الفاتحة علي ضحايا قضايا الشرف المزيفه. 

رسالة اللي أسحابي

Salut mon amis,

Comment Ca Va ?pour moi, je suis bienne, ( I Missed You So Much). Apres ce niveau I feel sad and depressing. I miss when we sat in "a la cafeteria", boire du cafe et mange des croissants, and how we feel FOLLE au bout de 2 minutes from starting the class.

　

I miss our sitting in front of conditioned, et sensation de froid. Repeated our question " do you understand something?", smilling like a fool there with poor eyes wander "what does she said ? what does she mean?" and the funny thing our standard answer " Je ne comprenais pas ".

　

I missed you and our conversation what have we done and what we didn't do, like studied some French before presence to test. And I missed too our MIX a little of French with a lot of Arab.

　

I know since now the third level would be is not complete perfect without you .

　

I wish for you the happiness.

with my love,

baise

Hebatullah.



أنا طير...

زمان لما كنت صغيرة كنت غاوية قوي قوي قوي أفلام اسماعيل يس وبقلده وكمان عمرو دياب وكنت بقول علي عمرو دياب دا خطيبي وكنت بتخيل دايما انه بيغنيلي انا لحد ما جيه في مره سمعت أنا طير في السما كان الفيلم دا وقتها مشهور وبيتعرض علي التليفزيون ... عارفين كنت اعد في غرفتي وسط لعبي وكراكيبي اسمع الاغنية دي وابص من ازاز الشباك علي الشارع ... عمر ازاز بتنا دا متفتح الا عشان ننشر الغسيل وغير كده كان ممنوع وكان معمول فاميه بس نقدر نشوف الناس اللي بره ... كنت اعد كده وابص واتخيل حاجات كتيره ... كنت بتخيل اني عصفوره ساعات وبطير فوووووق في السما او اني قزمة وعايشة مع سرب أوز مهاجر زاي ( نيلز ) كنت بقول لنفسي كتير انا لو جبت طفل هاسميه نيلز وكان نفسي اعيش مغامرات نيلز دي وكنت معرفش ليه كل ما افكر في نيلز افتكر انا طير في السما ....
انا فاكره مره ماما دخلت عليا وانا رابطه الملاية البيضة في رقبتي وبنط من السرير علي الارض وانا بغني الاغنيه دي وعماله الف في الاوضه ... وقتها سألتني بتعملي ايه؟ قلت ليها بلعب اني نورس ... كنت بحب كل طير لونه أبيض .. أوز , بط , دجاج, عصافير, نورس, بجع ... معرفش ليه كنت بحس اني واحده منهم.

ياتري لو اهلي كانوا شافوني من جوه صح من صغري لما لليوم كان الحال اتغير؟؟ أكيد كان شكلي اتغير وشخصيتي اتغيرت وافكاري اتغيرت ... مش زعلانه لانهم مشفونيش لكن فرحانة انهم شايفني دلوقتي ... حتي لو شايفني مشكلة كبيره لكن شايفني ... في ناس ممكن متشوفكش خالص ودا الاصعب.

هذا انا ... الواجب

أنا اتبرعت وتطوعت إني اعمل الواجب دا :)) غلاسة بقي, تقليد, مش لاقيه حاجة اعملها قولوا اللي تقولوه المهم هاااااعمل الواجب ياعني هاااااعمل الواجب هااااه بقي ...

السؤال الاول

عرف نفسك..

الله السؤال دا قصير بس اجابته طويلة ... انا هبة اللة نظمي محمد نمر عبد ( في كام اسم كده بس مش حفظاهم كما اتذكر كان بنهم حمزه والله اعلم ) الحاج محمد , أردنية وافتخر ...عايشة في مصر, كاتبة ... كاتبة في ايه بقي ؟؟ علي باب الله ... مواليد 7 يناير بعتز وبفتخر جدا بيوم عيد ميلادي واي حد مواليد شهر يناير وبرج الجدي له معزة خاصة عاندي جدا ... شخصية متنعكشة ... وكل ما اروق وارتب وانسق نفسي انعكشها تاني عادي بقي اتعودت علي كده والحمد لله

************

السؤال الثانى

ما اكثر مايميز شخصيتك

جريئة

**************

السؤال الثالث

ماهى اهم نقطة تحول فى حياتك

هي حاجات كتيرة أولاً كانت مرحلة الجامعة فأجاة وانا في 3 جامعة كنت بقي دخلت الـ18 وشوفت اني كبرت وعيب اروح اللعب في الملاهي بتاعت دريم بارك دي عارفنها ... عشان كده مكنتش بطلع رحلات في الجامعة كنت بحسهم اطفال في حين اني كنت بقي بفكر في الشغل... ثانيهم واهمهم وفاة امي واني بدأت اشوف الناس علي حقيقتها بقي لان امي دي كانت عائلتي كلها الوحيدة أبويا متوفي من كنت طفلة بنت 5 شهور فا وفاة ماما وانا لسه مخلصة دراسة كان صعب ليا وانها ملحقتش تفرح بنجاحي او تخرجي او تاخد خيري اللي زرعته سنين... ثالثهم الشاب اللي ارتبط بيه علمني درس مهم جدا ان الكذابين والممثلين كتير قوي جدا وان مفيش واحد يستحق ثقه كاملة 100%

***************

السؤال الرابع

كيف دخلت عالم التدوين

بالصدفة ... انا لقيت كذا حد بيسألني انتي معندكيش مدونة ليه انتي معندكيش مدونة ليه؟؟ وانا كنت معتمدة علي الفيس بوك والاماكن اللي بكتب فيها علي النت وخلاص وبعدين عملت مدونة اسمها{ انا عايزة اخلع } كنت بحب المدونة دي جدا بس مجتش علي هواء العائلة لاني كنت بفضفض فيها واعتبروا اني بفضحهم في وقت ان مكنش عندي منفس غيرها

*******************

السؤال الخامس

ماهو اسم مدونتك وكيف اخترته

اسم مدونتي { تحت البلكونة } وهو بسبب حاجات كتيره ... اصلي ساكنة في الدور التاني وان شاء الله قريب هاعزل اللي شقة في الدور التامن فيها بلكونة وبما ان الشقة القديمة اللي انا فيها دي بلكونتها مش بلكونة اكتر ما هو منشر ... حابيت اتكلم عن حاجة من المستقبل ان من بلكونتي بقي الناس اللي تحتها هايكونوا ازاي بما اني هاكون فوق وانا تحت براقبهم وبما ان مدونتي كلها ارصاد جويه فا عشان كده بقي يعني :))

****************

السؤال السادس

صف مدونتك

مدونتي هي مدونتي لا اكتر ولا اقل ... مكان لما بحس بالوحدة بلجئ له ... لما بحس بالارهاق او اني افضفض بجري عليه ... مدونتي بقت شريك حياتي بصحي الصبح أصبح عليها ... اسلم عليها ...قبل ما انام امسي عليها ...بصراحة مدونتي بنتي ... والاب توب بتاعي هو شريك حياتي شاف كل الايام الصعبه معايا والحلوة ومتحمل ومقلش لاء برغم اني مبهدلاه وربنا ... ربنا يباركلي فيك يا رب ولا يحرمني منك يا لابي.

***********************

السؤال السابع

من هم اكتر 3 شخصيات اثروا بك من داخل عالم التدوين او خارجه

اول شخص أثر فيا هي امي طبعاً الله يرحمها ... ثانيهم مي بنت زيادة مثلي الاعلي وبسببها انا موجوده النهاردة ... ثالثهم دَانيال ستيل ... مش عارفة اخرج من شخصية فيكتوريا اللي هي ابتكرتها في رواية ( بدينة ولكن )  وشخصية كارتونية اسمها " لين " من مسلسل كارتون اسمه ليدي ليدي علمت جوايا من صغري.

حاجة كمان اضفها ... انا كل المدوينين بأثروا فيا والناس اللي بقبالهم في الواقع كمان .

*******************

السؤال التامن

ماهى طقوسك الخاصة فى الكتابة

انا معنديش طقوس خاصة ... بس عشان امخمخ لازم اعد في هدوء ... ودايما الافاكر الحلوة تجيني يا اما في الحمام يا اما وانا في الشارع في مكان غير مناسب في توقيت غير مناسب اكتر

******************

السؤال التاسع

ماهو اسلوبك المفضل فى التدوين

والله بحب اخلق لهجة جديد ... انا يعني بحب اكتب بالطريقة اللي بتكلم بيها وبالطريقة اللي بنطقة بيها عشان يتخيلوني ويحسوا انهم سامعين صوتي بحق وحقيقي يعني :))

*****************

السؤال العاشر

ما اهم ما يميز تدويناتك

ونبي معرف ... يمكن والله اعلم دمها خفيف؟؟ هاسبكم انتم تردوا ... ايه مايميز تدوينتي ؟؟

تصدقوا وانا بكتب السؤال تخيلت نفسي بقولها بطريقة ام مشمش وحاسيت اني كان لازم اسم المدونة ام مشمش مثلا :))

***************

السؤال الحداشر

ماهو تقييمك لعالم التدوين فى الفترة الاخيرة

والله انا شيفاه عالم جيد واكتر من جيد كلهم كانهم اسرة وعائلة واحدة بجد وانا سعيدة اني وسطيهم من تاني

لكن محتاج تنوع شوية لاني فاجاة مع السياسة حاسية فيس بوك وتويتر جديد.

***************

السؤال الاتناشر

ماهى اقرب تدويناتك لنفسك

بصراحة كلهم قريبين قوي مني ... وبالاخص موضوع ندون شهر كده دا اي نعم متعب وممل بس فكرني بشهر رمضان اللي بنتجمع فيه كلنا علي الفطار :)

******************

السؤال التلتاشر

استعرض اهم المواقف الطريفة اللى صادفتك مع التدوين

الله ... مره واحده داخله او واحد او ما عملت المدونة دي ودااااااخل يستفزني بس او تستفزني بس عشان اشتمه واهزقه واطلع اخلاقي البكابورت عليه وخلاص وسبحان من لمني والله

******************

السؤال الاربعتاشر

هل احدث التدوين تأير عليك ؟وكيف؟

اه طبعاً ... في ناس عرفوني اكتر وعرفة ناس اكتر ونفسيتي بقت احسن الحمد لله

*****************

السؤال الخمستاشر

اختر اى مدون ووجه له سؤال

لا انا مش هاختار حد ... انا هاسيبه تطوع ... بس المهم المتطوع يبعت لي اللينك عشان اقراه واناكفه بقي

********************